الأحد، 24 فبراير، 2013

أسرار النجاح في كيونت Qnet

أسرار النجاح في كيونت Qnet

الجزء الاول




أووووووووكي !!! .... مرحبا بك في كيونت .. مبروك هي أول كلمه هتسمعها علي طول بعد ما تعمل ( sign up ) . ودلوقتي الموضوع بسيط جدا
أول حاجه هتقول لكل اللي تعرفهم وتحاول تدخلهم تحتيك في الشبكه .... بس لو حقيقي عايز تكسب وبسرعه يعني بدل ما تبقي مليونير في 4 سنين تبقي في سنه وحده ... لازم تعرف ازاي تعمل ( presentation ) لازم علي الاقل 15 ( presentation ) كل شهر .... ودايما إفتكر قاعده -  SWS - someone will , someone won"t , someone is waiting - لا يأس مع الحياه ولازم تدخل أكبر عدد ممكن من الناس تحتك علشان تكسب كتيييييييييير

المقاله دي ببساطه هي منقوله من نفس ورق ال ( upline ) زي ما بالظبط ال (upline ) بتاعه كتبهاله وزي ما انت هتكتبها لل          ( downline ) بتوعك علشان كمان هما يعملوا فلوووووووووووس وكلنا نبقا ناجحين ونغير حياتنا :)

المقاله دي هتوضحلك إزاي تاكل دماغ أي حد ... وتقنعه إنه يدخل البزنس ده ... هي كده ببساطه (( كلام بيني وبينكم طبعا )) إزاي تغسل مخ اللي قدامك وتقنعه بأن حاجه ضايعه هي في الواقع فرصه عمره اللي كان بيحلم بيها
أنا بس عايز أوضح حاجه إن ساعات وانت بتقرأ المقاله حتلاقي كلام مكتوب بالاحمر ... ولا يهمك خالص ... ده علشان الناس الحقوديين اللي بيغيروا من النجاح الساحق اللي بنحققوا في حياتنا علشان لو قرؤا المقاله يفهموها برضه ... يعني انا بس باخدهم علي قد عقلهم ^_^ 
قبل أي شئ تاكد ان الشخص اللي عايز تشرحله قاعد عي يمينك مش يسارك !!! ليه ؟ بيقولوا ان المخ له جانبين الايمن والايسر
الجانب الايمن هو الجانب العملي المنطقي والجانب الايسر هي الجانب العاطفي فلما ال prospect يبقي قاعد وإنت علي ناحيه جانبه الايسر هيبقي مخه شغال بشكل عاطفي  وليس منطقي أو عملي  فكره كويسه برضه upline بقا ^_^
طيب بعد كده تقول له الاتي
1- يا ريت لو تقفل الموبايل علشان نعرف نركز
2- انا علي فكره مش هحاول اقنعك بأي حاجه إنت اللي هتقنع نفسك
3- علي فكره انت دلوقتي هتشوف ارقام ماليه كبيره جدا الارقام دي حقيقيه ويمكن تأكيدها (ههههههههه ابقي قابلني )
4- العقل مثل الباراشوت .. يعمل فقط وهو مفتوح  (الله يفتح دماغك يا شيخ )

بعد كده تسأله ليه الناس بتعمل أي بزنس ؟ وتكتب الاسباب كلها كلاتي :


دخل إضافي - حريه التصرف في أموالها - ليصبح لها عمل خاص بها - ليتاح لها وقت إضافي حر - لتطوير شخصيتهم - للتقاعد المبكر - لمساعده الاخرين - للتعرف علي الاخرين

ممكن يختار واحده أو اثنين أو كلهم المهم تخليه هو اللي يتكلم عنهم وانت تلتزم الصمت الهدف انك تعرف طريقه تفكيره واحلامه وطموحه ( علشان هي دي الاشياء اللي هتستغل إقناع الضحيه مش المنطق )
  
1- ما هي الاولويات بالنسبه لك ؟
2- لماذا اخترت ذلك ؟
3 - لما هي مهمه بالنسبه لك ؟
 4 - ما هي عواقب عدم وجودها 
5- هل عدم وجودها يسبب القلق في حياتك ؟

الفكره انك تجعله يتكلم ويخرج كل ما في داخله ويشعر بكل أحلامه وبحاجته اليها وقد تكون هذه هي المره الوحيده بالنسبه له ان تكون اول شخص يجعله يتكلم وليس انت من تتكلم طوال الوقت إجعلها فكرته هو وليست فكرتك انت إبحث عن المفاتيح لشخصيته ربما تكون المره الاولي التي يسأله فيها احد عن أحلامه فأترك له الفرصه ليتحدث

تبدأ بقي بعد كده تشرح فكره خايبه الهدف منها انك تطهقه في عيشته وتثبت ليه ان كل الوظائف المحترمه اللي بتفيد البلد وإقتصادها وظائف ملهاش أي ستين لزمه وإن الامل الوحيد ليه لتحقيق احلامه هو البزنس ده كالاتي

معادله الحريه والامان


B     
E
I
S

  E = الموظف المطحون مصاريف اكثر من دخله حالته حاله رئيسه في العمل مطلع عينه ... إلخ
S = صاحب مشروع صغير ... برضه لازم يروح شغله كل يوم ( كأنها جريمه يعني ) ممكن البزنس بتاعه يفلس برضه دخله مش عالي
B = رجل الاعمال الكبير مثل بيل جيتس ... فلوس متتعدش ... ممكن يقعد شهر ميروحش الشغل وبرضه هيكسب
I = المستثمر الكبير برضه زي رجل الاعمال الكبير

E , S  لديهم الامان ( مرتب اخر كل شهر ) و B , I  لديهم الحريه والمال الكثير

بعد كده تسأله : الناس ممكن يوصلوا من  E الي S الي B الي I في كام سنه
هيقول أي رقم - قوله النظريات بتقول من 30 الي 40 سنه (( انا مش عارف نظريات ايه بصراحه ^_^ بس يللا ما هو محدش فاهم حاجه )) وده علشنا تسود عليه عيشته وتوضح ليه ان مفيش حل للازمه اللي اصلا مكنش حاسس بيها تماما او بيعاني منها ( ما هو ده غسيل المخ ... تقنع واحد بحاجات اساسا مش محتاج لها )
طيب الحل في المشكله دي ايه ... فيه بيزنس يقدر يحقق ليك المعادله اللي فوق دي في 3 - 5 سنين فقط ... ممكن يرد عليك ويقولك طيب ما هي العقارات او البورصه ممكن تعمل كده ... في الحاله دي هووووووب لازم تلحق نفسك ... عقارات ايه وبورصه ايه اللي تبني اقتصاد البلد ... لألأ ترد عليه علي طول وتقول ان الحاجات دي عايزه راس مال كبير وفيها مخاطره كبيره ( وطبعا نسبه الفشل في البيزنس ده اللي تبلغ 96 % متعتبرش مخاطره ... بس إوعي تجيب سيره الموضوع ده دلوقتي خالص .. دي حاجه يبقا يعرفها منك برده بعد ما يدخل  ويدفع .. يعني طبعا علشان توضح ليه ساعتها إن الموضوع مش هزار )

تساله عن دونالد ترامب ؟ ده من كبار رجال الاعمال في امريكا وكتب كتاب إسمه (why we recommend network markting ) وده علشان يعرف إن كبار رجال الاعمال بينصحوا بالمشروع الناجح جدا ده ( أولا هو مش كتاب دي مقاله !! ثانيا والاهم دونالد ترامب يقصد التسويق الشبكي بالاساليب الاقتصاديه والعلميه السليمه مش بإستخدام الانظمه الهرميه زي كيونت )
إسأله السؤال الاتي : هل سمعت عن الاحصائيات دي ؟ ( أي إحصائيات وأي جهه بالظبط اللي عملتها الله اعلم :) )  وتكتب من فوق لتحت وده برده علشان تطلع بيه من القاع والناس الغلابه للثراء الفظيع ^_^ 

0.1 % are in the positive zone  يعني الدخل أعلي بكثير من المصاريق 
2.9 %  are in the natural zone  يعني الدخل يساوي المصاريف
97 % of the people in the negative zone يعني الدخل أقل من المصاريف 

الهدف من البزنس ده إنه يطلعك من المنطقه السلبيه ( وركز علي السلبيه دي ) إالي المنطقه الايجابيه ... طبعا نلاحظ انه حتي هذه اللحظه مفيش كلمه واحده عن تفاصيل البزنس وخطه الشركه ... كلها معلومات ومناورات لاستخدام احلام وطموحات التاس وإقناعهم بأن حياتتهم الحاليه سلبيه وحضيرهم للحل الوحيد للخروج من هذا المأزق وهو الانضمام لافشل بزنس ممكن حد يعمله

هنتوقف لحد كده إنهارده لان الموضوع كبير لكن هذه المقاله الجزء الاول وسوف تليها بإذن الله أجزاء أخري لمزيد من أسرار النجاح كممثل لكيونت ...

‏ليست هناك تعليقات:

إرسال تعليق


تعليقك يهمنا لتقيم مواضيعنا ...... من حق أي شخص التعليق ولكن ليس من حق أي أحد التعدي علي الاخرين فحريتك تنتهي عندما تبدأ حريه الاخرين وشكرا ....

وتذكر انه (( مَا يَلْفِظُ مِنْ قَوْلٍ إِلَّا لَدَيْهِ رَقِيبٌ عَتِيدٌ)) ‏